Anem Òc ! per la lenga occitana !

Crida per la manifestacion dau 24 d’octobre de 2009 a Carcassona

Aparar la diversitat linguistica e culturala dins lo monde es per leis annadas que vènon una escomessa dei grandas. En França, pasmens, la situacion legala es desfavorabla a-n-aqueu aparament. La lenga occitana, especialament, se tròba ben macada perque avèm ges de politica positiva per sa transmission.

Fa donc mestier, dins lo territòri onte se parla la lenga d'Òc, crear un environament favorable per l’ensenhament de la lenga e en lenga, per  la creacion culturala  en occitan, per la preséncia de la lenga nòstra dins lei media electronics, audivisuaus e escrichs, per son emplec dins la vida publica e sociala. Tot aquò favorizarà la transmission de la lenga dins lei familhas.

Lei media

Volèm un servici public de ràdio e de television en occitan. 

Demandam una ajuda especifica per leis operators privats (ràdios associativas, premsa, television) qu’òbran per la lenga.

La creacion

Lo sosten a la creacion, aquò vòu dire una politica especifica per promòure l’edicion, lo teatre, l’espectacle viu en generau, lo cinema e la musica. La populacion dèu posquer descubrir una cultura tròp sovent esconduda.

L’ensenhament

Fau que cadun pòsque chausir, se o vòu, un ensenhament sota de fòrmas variadas :

•        un ensenhament en occitan (bilingue a paritat orària o immersion) ;

•        un ensenhament de la lenga e de la cultura occitanas ;

•        un ensenhament especific vèrs leis adults.

Avèm besonh d’una politica d’ofèrta generalizada.

La vida publica

La lenga d'Òc dèu èstre presenta dins la vida publica; aquò vòu dire per exemple :

•        lo respect de la toponimia e la messa en plaça d'una sinhalizacion bilingua ;

•        un encoratjament a emplegar la lenga dins lei luecs publics e dins la vida sociala.

Aquelei demandas an una tòca unenca : que la lenga nòstra pòsque viure e que toteis aquelei que o  desiran pòsquen l'emplegar. S’adreiçan au còp ai collectivitats localas occitanas (comunas, comunautats de comunas, despartaments, regions) e a l’Estat. Cadun se deu encargar de çò qu’es de sa responsabilitat. Revèn a l’Estat d’adaptar sa legislacion.

Coordinacion Anem Òc !

Institut d'Estudis Occitans, organisme culturau reconegut d'utilitat publica

Felibrige, movement de defensa de la Lenga d'Òc

F.E.L.C.O. Federacion deis Ensenhaires de Lenga e Cultura d'Oc

Calandreta, escòlas occitanas associativas laïcas

Òc-Bi, associacion de parents d'escolans per l'ensenhament bilingüe public

Lo periòd de validitat de la peticion es ara passat.