Anem Òc ! per la lenga occitana !

Crida entà la manifestacion deu 24 d’octobre de 2009 a Carcassona

La preservacion de la diversitat lingüistica e culturau dens lo monde qu’ei un enjòc deus màgers per las annadas qui vienen.  En França, totun,  la situacion legau qu’ei desfavorabla a aquera preservacion.  La lenga occitana, especiaument, qu'ei miaçada per l'abséncia de politica positiva per la soa transmission.

Que cau donc, suu territòri on parlan l’occitan, crear un environament favorable a l’ensenhament de la lenga e dens la lenga,  a la creacion culturau en occitan, a la preséncia de l’occitan en los mèdias electronics, audiovisuaus e escrits, en la vita publica e sociau. Tot aquò que serà ua ajuda entà encoratjar la transmission de la lenga per las familhas.

Los mèdias

Que volem un servici public de ràdio e de television en occitan.

Que demandam ua ajuda especifica entaus operators privats  (ràdios associativas, premsa e televisions ) qui òbran en favor de la lenga.

La creacion

Lo sostien a la creacion, qu’ei ua politica especifica en favor de l’edicion, deu teatre, de l’espectacle viu en generau, deu cinèma e de la musica. La populacion que deu poder descobrir ua cultura qui estó tròp sovent amagada.

L’ensenhament

Que s’ageish de perméter a tots de causir, s’ac vòlen, un ensenhament dab fòrmas divèrsas :

• un ensenhament en occitan (bilingüe a paritat orària o immersion) ;

• un ensenhament de la lenga e de la cultura occitanas ;

• un ensenhament especific taus adultes.

Que s’ageish d’ua politica d’auhèrta generalizada.

La vita publica

L’occitan que deu estar present en la vita publica ; aquò vòu díser per exemple :

• lo respècte de la toponimia e la mesa en plaça d'ua senhalizacion bilingua ; 

• un encoratjament a l’utilizacion de la lenga en los lòcs publics e en la vita sociau.

Totas aqueras demandas qu’an sonque un objectiu: qu’ei de dar la possibilitat a ua lenga de víver e aus qui ac vòlen de l'emplegar. Que son demandas hèitas a l’encòp a las collectivitats locaus occitanas (comunas, comunitats de comunas, departaments, regions) e a l’Estat. Cadun que deu préner en carga çò qui ei de la soa responsabilitat. L’Estat que deu adaptar la soa legislacion.  

Coordinacion Anem Òc !

Institut d'Estudis Occitans, organisme culturau reconegut d'utilitat publica

Felibrige, movement de defensa de la Lenga d'Òc

F.E.L.C.O. Federacion deus Ensenhaires de Lenga e Cultura d'Òc

Calandreta, escòlas occitanas associativas laïcas

Òc-Bi, associacion de parents d'escolans per l'ensenhament bilingüe public

Lo periòd de validitat de la peticion es ara passat.