Anem Òc ! per la lenga occitana !

Apèl par la manifestacion delh 24 d’octobre de 2009 vès Carcassona

   Parar la diversitat lengüistica e culturala dins le monde par las ‘nadas que vènon quo-es una necessitat. En França, par aquò, la situacion legala es pas favorabla. La lenga occitana es particularament menaçada, que i a gis de politica positiva par sa transmission.

   Sobre le territòre ente se parla la lenga, chau crear un environament favorable a l’ensenhament de la lenga e dins la lenga, a la creacion culturala dins aquela lenga, a la presença de la lenga dins los mediàs electroniques, audio-visuales e escrits, a son emplèc dins la vida publica e sociala. Tot aquò será un encoratjament par la transmission de l'occitan dins la familha.

Los mediàs :

Volèm un service publique de radiò e de television en occitan.

Damandèm una ajuda 'specifica par los operators privats (radiòs associativas, televisions, premsa ) que trabalhan en favor de la lenga occitana.

La creacion :

Le sosten a la creacion, aquò vòu dire una politica ‘specifica par l’edicion, le teatre e le ‘spectacle viú en general, par le cinemà e la musica.

La populacion diú podir descobrir una cultura tròp sovent resconduda.

L’ensenhament :

Chau que chascun pueche chausir, si le vòu, un ensenhament embei las fòrmas divèrsas :

• un ensenhament en occitan (bilenga a paritat orara o en inmersion).
• un ensenhament de la lenga e de la cultura occitanas.
• un ensenhament ‘specifique par los adultes.

Volem una ofèrta generalizada.

La vida publica :

L’occitan, lo chau trobar dins la vida publica. Aquò vòu dire par eisemple :

• le respèct de la toponimia e la mesa en plaça d’una senhalizacion bilenga.
• l’encoratjament a l’utilisacion de l’occitan dins los luòcs publiques e dins la vida sociala.

   Totas quelas demandas son mas par una besunha : permètre a una lenga de viure e, bei tota queus que le desiron, de l’utilizar. S’adrèiçon d’un mème còp a las collectivitats (comunas, comunautats de comunas, despartaments, regions) e bei l’Estat. Chascun diú prendre en charja quò qu’es de sa responsabilitat. Apartèn a l’Estat d’adaptar sa legislacion.

Coordinacion Anem Òc !

Institut d'Estudias Occitanas, organisme culturau reconeissut d'utilitat publica

Felibrige, movement de defensa de la Lenga d'Òc

F.E.L.C.O. Federacion de los Ensenhaires de Lenga e Cultura d'Oc

Calandreta, escòlas occitanas associativas laïcas

Òc-Bi, associacion de parents par l'ensenhament bilingüe public