Carcassona 24 d’octobre de 2009

Anem òc ! per la lenga occitana

 La letra (en format pdf)

A totas las associacions de promocion de la lenga occitana

A tots los que son estacats a la lenga e a la cultura d’Òc

A tots los que vòlon que de decisions politicas sián presas en favor de la lenga nòstra

Lo comitat d’organizacion de la manifestacion del 24 d’octobre de 2009 a Carcasssona es a l’òbra dempuèi de meses. La coordinacion Anem Òc ! fonciona.

Localament lo monde de Carcassona se bolegan per començar de reglar las questions materialas.

Es ara vengut lo moment d’organizar un pauc pertot de comitats locals per començar de mobilizar pel 24 d’octobre. Serà una granda manifestacion.

DEVÈM ÈSTRE ENCARA MAI NOMBROSES QUE LOS 20 000 de Besièrs en 2007.

Es pas una manifestacion de mai, es una etapa de mai dins la presa de consciéncia del monde que vivon en país d’òc.

Amb las doa primièras manifestacions avèm tocat una populacion que jamai aviá ausit parlar de la lenga occitana e de nòstras reivindicacions.

Un debat parlamentari se prepara per la fin de l’annada. D’eleccions regionalas se preparan pel començament de 2010. Devèm pesar de totas nòstras fòrças per nos far ausir.

La reconeissença de nòstra lenga dins la constitucion obtenguda l’an passat es simbolica segur, mas a permés a mai d’un de justificar son accion e de la poder legitimar.

Nos demòra encara de camin. Qualques collectivitats  començan de metre en plaça de politicas lingüisticas. Es encara timide, mas cal absoludament butar per ganhar encara mai de reconeissença e de mejans per la lenga.

Amb las autras lengas

Anem Òc ! participava a costat de las autras lengas lo 20 de mai passat, a una amassada amb de parlamentaris a l’Assemblada Nacionala. I avèm portat la votz del país d’òc amb un tèxte comun signat amb nòstres amics basques, catalans, bretons, còrses, alsacians e reünioneses.

Dins aquel tèxte i disèm çò que volèm veire pres en compte dins la futura lei.

Sabèm que i a encara de parlamentaris qu’an besonh d’èstre sensibilizats. Mas qualques unes son prèstes a far lo camin per adoptar una lei que serà una etapa de mai.

La capitada de Carcassona es donc una condicion per nos far ausir.

Serà tanben lo mejan de far prendre en compte nòstras reivindicacions dins l’encastre de las futuras eleccions regionalas de 2010.

Lo 24 d’octobre a Carcassona deu èstre lo moment de convergéncia d’un grand nombre d’iniciativas localas e regionalas. Cal interpelar deputats, senators, conselhièrs generals e regionals.

La plataforma d’Anem Òc ! es un tèxte simple, que resumís plan las demandas exprimidas pels uns e pels autres. Avèm besonh d’afortir çò qu’avèm realizat amb las protèstas de 2005  e de 2007.

Avèm ganhat en visibilitat, en reconeissença e en credibilitat. Las associacions, los militants un pauc pertot i an trobat una font d’energia per contunhar lor trabalh quotidian.

La coordinacion Anem Òc dispausa ara d’un secretariat permanent. Vos permet de demandar lo material d’informacion sus la manifestacion de Carcassona (afichas , tracts, camisets, dossièrs de premsa).

Vos permet tanben de far saber las iniciativas que se prenon en cò vòstre.

Avèm tanben besonh d’un sosten financièr e material.

Las amassadas del comitat son dubèrtas e las ajudas son las planvengudas. La que ven se farà lo 1èr de julhet a Carcassona a 14 h

Amassa podèm fòrça !

Anem òc ! per la lenga occitana !