Coordination ANEM ÒC !

Institut d'Estudis Occitans, Felibrige, Calandreta, Òc-Bi

Federacion deis Ensenhaires de Lenga e Cultura d'Òc

comitat.anem-oc@club-internet.fr

04 42 59 43 96 / 06 77 49 37 78

Contacte premsa : 06 83 01 19 37

Site : anemoc.org

 

 

Dissabte 24 d’octòbre de 2009,

25000 personas que fan sonar la lenga occitana per carrieras dins Carcassona, totei categorias e generacions confondudas… degun pòu contestar qu’es una capitada dei bèlas…

maugrat segurament pron d’imperfeccions… mai ges de dobte : son plus quauquei militants associatius que se fan plaser… es ben una demanda societala…

e desiram de vos regraciar encara un còp d’aver sauput demorar mobilizats per venir afiermar mai que jamai vòstra volontat de viure vòstra lenga dins la vida vidanta publica !!!

e quin envam, quin esper davant aquestei milierats de joines, portaires d’una volontat d’avenidor per la lenga que parlan… lèsts per s’investir e prendre en carga aquest avenidor.

 

La cubertura mediatica s’es ben alargada emai s’es pas encara perfiecha…

Constatam que nòstra visibilitat cambia… avèm progressat en dinamica, en seriós, dins la qualitat de l’imatge que remandam...

D’autra part, mai d’un participant pensan que de se tornar trobar, aperaquí totei lei dos ans, per afortir son estacament a la lenga e a sei drechs de vida publica a de consequéncias positivas au còp sus la societat e sus lo monde politic.

Fòrça monde encara, dison que lei tres manifestacions passadas li an tanben servit per dinamizar son accion dins son relarg pr’amor que de saupre que siam milierats a defendre la lenga, aquò dona de vòlha per seguir puei lo trabalh de proximitat, pas totjorn aisat.

 

Nòstra legitimitat s’es renfortida. Nòstrei revindicacions son justas e demoram pacifics mai, mai que jamai determinats.

 

Despuei 2005, lei tres manifestacions an fach avançar lei causas (emai s’es d’un biais inegau segon lei regions).

Mai, de tot segur, es pas pron e la mobilizacion demòra totjorn mai d’actualitat !

 

 

Au moment de la redaccion d’aqueste bilanç, fa gaire que sabèm (emai se s’en dobtaviam) que lo governament respectarà pas sei promessas e que lo projècte de lèi l’an jitat ais escobilhas !

 

Adonc, mai que jamai es a nautrei ciutadans d’intervenir per faire pression.

 

Faire pression pròchi lei deputats e lei senators per insistir sus l’importància que sigue votada una lèi (e de qualitat !), ambé de vertadieras avançadas coma siguèron presentadas dins lei diferents tèxtes qu’an servit per la mobilizacion fins ara.

Fau demandar ais elegits d’interpelar lo governament per que tengue seis engatjaments e respècte lei promessas fachas en public.

Fau mandar letras, corriels, comunicats a la premsa, etc… que se sente que la demanda es fòrta…

 

 

Anem Òc ! après lo 24 d’octòbre de 2009 ?

 

● Lo Comitat Anem Òc a decidit d’intensificar sei relacions ambé leis autrei lengas de França.

Rapelam qu’una plata-fòrma siguèt ja redigida e cosignada, lo 20 de mai de 2009, per lei federacions que s’encargan dei lengas basca, bretona, corsa, catalana, alsaciana e creòle de la Reünion.

Aqueu tèxte fa la lista deis elements necessaris dins una politica per que sigue una vertadiera politica linguistica eficaça.

 

Per 2010 e 2011, d’accions comunas li seràn prepausadas : seràn

Per 2010, una accion pas obligatòriament de massa, a Paris, mai ambé una portada simbolica e mediatica fòrta. La fòrma ne’s pas encara trobada e serà de discutir dins un acamp venent ambé elei.

Per 2011, serà temps d’avisar, au fiu deis eveniments e dei concertacions…

 

● Anem Òc pensa tanben de se virar devèrs lei regions sinistradas coma Lemosin e Auvernha, per li faire comprendre que lei revindicacions son valablas per elei tanben, que pòdon pas laissar de caire son identitat occitana e que devon prendre en còmpte lo trabalh fach ja per leis associacions occitanas de son territòri…

Se fau pas resignar a laissar de collectivitats prendre de retard subretot quand son de regions que la lenga l’i es ben viva.

 

● Enfin, per la prima de 2012 (avans leis eleccions) : lo principi d’una manifestacion unitària Anem Òc, panoccitana.

Ges de chausida de facha, per lo moment, nimai sus lo luec nimai sus la fòrma…

Probable que tot aquò se formalizarà au començament de 2011.

<!-- @page { margin: 2cm } P { margin-bottom: 0.21cm } -->

 

■ Lo budget d’Anem Òc per l’organizacion de la Manifestacion es estat de 30 000€.

Mancan de trobar 8000€… De segur leis associacions partenàrias de la Coordinacion participaràn a clavar aqueste budget…

mai Anem Òc fa rampelada a toteis aquelei que pòdon faire de dons... seràn lei benvenguts (lei còmptes detalhats seràn mandats ai donaires, a sa demanda).

(De mandar a IEO-Anem Òc. 11 c Malcosinat 31000 Toulouse / Chècs a l’òrdre de IEO-Anem Òc)…

E un grand mercé a toteis aquelei que nos mandèron ja una participacion.

Anem Òc prepausa tanben de vendre an un pretz preferenciau, e en nombre, lo materiau que demòra coma per exemple de camisons e de casquetas (3€ l’unitat, per lòt de 100€). Es de materiau que pòu servir a d’uneis associacions per donar de jòias, au moment de manifestacions diversas coma una dictada, un concors ò un lotò, etc...

Consideram que lo retorn sus investiment, se se pòu dire, es bòn.

Per aqueste budget la lenga occitana e lei revindicacions que li son estacadas an beneficiat d’una exposicion mediatica mai qu’interessanta. L’imatge de la revindicacion en favor de la lenga d’òc es tanben valorizada, tant ais uelhs de la populacion coma dau monde politic.

Es la promiera manifestacion en favor de la lenga occitana que recampa tant de monde dins l’istòria dau pais d’òc mai tanben dins l’istòria de l’ensems dei lengas dichas regionalas de França.

Per Anem Òc

 

Ana-Maria Poggio

Esto 20 de decembre de 2009

 

Contacte : Anem Òc ! comitat.anem-oc@club-internet.fr / 04 42 59 43 96.

Premsa : 06 83 01 19 37